醬料包包

大蚊係 "醬料包包怪"!!! 是但喺廚櫃攞出黎都已經有咁多 @@.............


大蚊最初學煮餸嘅時候好抗拒用呢d包包，因為自己都唔識煮，用咗佢地，就算煮咗出黎都仲係唔識煮個餸呢!! 通常都係臨時加餸先會用佢地!!!

----------------------------------------------------------------------------------------------

最近大蚊心態唔同咗，用多咗d包包，主張原因 (藉口)有三:-

(a) 大蚊唔可以話自己煮得好叻，不過都算係"身經百戰" (700幾個菜喇出咗...)，算係有d煮餸嘅基本知識，間唔中都會偷下雞;

(b) 太多house warming，講求快靚正質素穩定，d包包係好幫手!

(c)懶 (呢個先係主因!!)

----------------------------------------------------------------------------------------------

懶咗咁多次，今日等大蚊寫番個小小總結，同大家分享吓d心得:

李x記類:

最熱門嘅選擇，價錢平，味道多樣，絕對係for返工一族嘅偉大發明! 味道簡直係精鍊而成，完全係大眾化口味，點煮都啱食，唔會失禮!

用法廣泛，干燒明蝦又可以用黎整干燒焗雞翼  ，魚香醬夾小棠菜又一流!! (魚香小棠菜) 用佢地呢有時都唔算係偷懶，反而可以發揮創意呢!!!

作品: 橙香蜜桃煎玉子豆腐、照燒焗雞翼、 魚香雞丁、麻婆豆腐、魚香小棠菜、 魚香茄子、京醬炒三絲 、椒絲腐乳炒通菜、干燒焗雞翼       



東南亞類:

朋友介紹，由新加玻沙爹雞串開始，原來超市 (無論大細)都有好多異國包包賣! 可能係sell俾d外傭嘅???? 有d係散裝包包，好似上圖肉骨茶嗰d; 有d係盒裝 all-in-one，好似新加玻沙爹雞串咁~

價錢係$10-30不等，點計都唔算貴! 因為呢d菜式唔係日常主要食物，就算d配料幾平都好，買完返黎煮一次就擺喺度得過期，真係無謂呀!

d醬料通常係配粉麵飯，用途比較專一，即係例如肉骨茶包包你唔會攞去醃牛扒or煮意粉???

作品: 海南雞脾飯、 新加玻沙爹雞串、香菇喇沙炒飯



西菜類:

價錢都貴，十幾蚊以上，大蚊通常係用白汁，因為有數得計，淡忌廉 (whipping cream) 一盒200ml都賣$15-20，買呢個加d奶唔駛煩!!

大蚊最愛係ikea 白汁粉，又經濟又好味~~~推介呀!!!

除咗白汁都仲有其他選擇，好似d墨西哥嘢，10蚊一包已經係原汁原味，買一隻香料都唔得呢!!!

作品: 車打芝士焗雙花、ikea 白汁焗豬扒蝴蝶粉、 白汁焗雞皇飯、 ikea白汁肉丸意粉、芝士白汁香蒜焗雜菜 Creamy Garlic Vegetable、Mexican Taco Casserole **、Mexican Pork Tacos **

----------------------------------------------------------------------------------------------

今日講到呢度，呢排大蚊真係比較長氣，懶係多理論咁，請見諒!!!